કોણ કહે છે કે આ શહેર સલામત નથી,

કોણ કહે છે કે આ શહેર સલામત નથી,
રોજ અહીં રાત એકલી ફરે છે,
સ્ટ્રીટલાઇટની નિર્લજ્જ રોશનીથી
ડરીને ગલીઓમાં સંતાતી ફરે છે,
વળાંકવાળા કાળા રસ્તાઓ પર,
મોંઘેરા શિયળને ડાઘ વિના સાચવે છે,
રોજ સુંદર રાત અહીં એકલી ફરે છે,
પોલીસના માણસખાઉ પેટ્રોલિંગથી દૂર રહે છે,
કૂતરાઓની વચ્ચે રહે છે,
ગોળ વળીને ઉભેલું ટોળું જોઇને , 
સાવચેતીથી રસ્તો બદલે છે,
રોજ યુવાન રાત અહીં એકલી ફરે છે,
બેડરૂમોમાં રોજે રોજ થતા રેપથી ,
ઘર છોડીને અચાનક ભાગી છૂટી છે,
હવે શહેરમાં સલામત ફરે છે,
રોજ રાત અહીં એકલી ફરે છે,